2014年2月3日星期一

新年雜感






不經不覺,原來今個已是我在瑞士第十個農曆新年,在這裡沒有新年假期,也沒有年宵可逛,節日氣氛是零.而我也越來越懶,今年只做了最基本的「賀年套餐」--- 年糕和蘿蔔糕,用味蕾去感受過節的感覺.

其實自從成年之後都沒有特別喜歡過新年,但最有印像的是在香港時差不多每年都會和家人去大球場看賀歲波,想當年香港本土足球還是有點份量的年代,但如今我在香港網上新聞只看到一些不知名的球隊名和打假波的醜聞,美好的年代,一去不返了.(香港現在還有沒有賀歲波的?)

最愛過年還是小朋友的時代,因為只有每年一次可以任吃糖果和朱古力,還有過節才會出現的花街朱古力,雖然其實大部份都很難吃,但每次見到那個紫色鐵盒和那些閃令令的包裝紙總會令我喜上心頭.金杯朱古力和麥提莎也不錯,最怕是收到强國老翻麥麗素.

今年香港過年沒有活雞吃,但記得小時候活雞是我的惡夢,因為阿嫲總會在過年前買定一,兩隻雞回家自己屠宰,沒有親眼目睹,但單單是聲效已叫小朋友心驚膽顫,事後現場更有如恐怖B movie場景,現在大抵沒有人會在家劏雞了.

前兩天和同事談起在香港時年初四上班會有開工利是,同事回應:「現在休想,德國公司最「孤寒」!」,也罷,反正我在這兒也不用派利是(就算派都是五封以內).

懷了一輪舊,也是時候展望將來,剛做了新一年的工作appraisal,得到很好的評分,同時亦預計來年的挑戰會更大;今年亦將會是我和B先生結婚十週年紀念,可幸是雖然大家已相識了十六個年頭,但總有聊不完的話題,也有相近的價值觀和嗜好,是終身伴侶也是知己.

還有很重要的是今年會是我最後一年「三字頭」,所以,這個馬年一定要好好珍惜,好好的過!


38 則留言:

  1. 祝福你來年生活得更豐盛,美滿!bless you!

    回覆刪除
  2. 新一年還未跟你拜年,祝龍馬精神,心想事成!

    回覆刪除
  3. 最怕是收到强國老翻麥麗素, 甚有同感! 以前仲有金杯朱古力, 你有無食過呀?

    回覆刪除
    回覆
    1. 金杯好食呀! 重有吉百利旋風朱古力都係兒時最愛

      刪除
    2. 重有花街朱古力拖肥,時時得人歡喜。

      刪除
  4. 花街金杯麥麗素完全有同感.

    回覆刪除
    回覆
    1. 花街好耐無食過咯, 宜家新包裝個盒又無以前咁靚

      刪除
  5. 要好好享受3字頭呀,一到4字真係身心都無辦法唔認老。

    回覆刪除
    回覆
    1. 哈哈, 咪話4字頭, 3字頭開始已發覺自己唔捱得夜, 想扮後生都唔輪到我咯

      刪除
  6. 賀歲波仍然有。今年的冠軍是香港代表,叫做「公民昆卡聯隊」,聽個名就知有幾好波 :)

    回覆刪除
    回覆
    1. 咁係咪對外隊架? 「公民昆卡聯隊」聽個名都知頂瓜瓜......

      刪除
    2. 係對外隊,不過係流夾愁嗰隻 (依家才發現妳的回應。話時話此刻室外氣溫得六度左右,six degree…)

      刪除
    3. 咁要再食多餐咖喱啦 :P

      刪除
    4. 蓬萊咖啡屋,好嘢嚟架!妳知唔知今晚點解要去蓬萊咖啡屋丫?因為....(sam hui tone)"心嚮往蓬萊......"

      刪除
    5. 咁風騷, 發生咩樹呢? (八卦mode)

      刪除
    6. 冇樹冇樹。其實香港今日農曆年假全面徹底完結(放長假那些亦都回來了,也許還有少量滯留大風雪的東京),遇上氣溫急降,成為接近無限憂鬱的藍色星期一。全城冷清,夜市蕭索,唯有火鍋店滿座,於是爬逆水,去蓬萊而已。(幾咁反高潮mode!)

      刪除
    7. 重係好凍喎,有得打邊爐未呀?

      刪除
    8. 經妳一提,一於今晚打打佢先!

      其實對瑞士人嚟講,我估香港呢啲所謂嘅冰簡直係小兒科啦係咪?

      刪除
    9. 不過今年我哋無咩雪, 今日重好暖, 又好太陽, 好似春天咁.

      刪除
  7. 今年朋友在旺角火車站落的士被道友開車門收錢..(這種事已經N年冇發生).. =S
    me too !! 我的策略是忘記自己咩字頭, 保持心境年輕.. Heehee.. 你在海外更覺young啦..

    回覆刪除
    回覆
    1. 老翻麥麗素你仲記得.. ET:"麥麗素,送禮好,禮到心又到!" (ET滿腦子無謂野,哈哈!!)
      好似"金鷹"都有番版,超難食!

      刪除
    2. 我都記得首廣告歌喎 :) 金鷹都有老翻? 我淨係記得果d金幣古朱力, 强國出品果d超級難食!

      刪除
    3. btw 金雞sss 好睇! 不過歐洲有可能會上嗎?
      成套戲簡直反映嘅香港人慘況

      刪除
    4. 但係套戲個message係受咗咩委屈, 'good' 一聲吞咗佢就算喎, 同埋我係唔睇吳君如d戲架. 近期最想睇既港片係《那夜凌晨,我坐上了旺角開往大埔的紅VAN》, 陳果執導, 我呢度間arthouse戲院可能有少少機會上既.

      btw, 我五月返香港呀, 你果陣會唔會又出咗門? 如果唔係的話大家食餐飯啦, 你移咗民就更無咩機會見了.

      刪除
    5. 係呀,'good' 一聲吞咗佢就算喎, 都唔知點解忍到. 其實金雞1,2都冇睇過,聽人話今次好睇先睇,我都麻麻地吳.
      sure ! i will be in HKG in May, change plan to activate visa in march instead.

      刪除
  8. 咁祝你步步高升!!!其實appraisal有好成績,真係對自己有好大鼓勵作用同motivation㗎。

    回覆刪除
    回覆
    1. Thanks :) 我都祝你新一年心想事成, 最緊要身體健康, 龍馬精神.

      係架, 我呢個新老頂真係好好, 我都係第一次做appraisal 時有上司好誠懇地同我講: thank you for your good work in the past year. 真係心都甜哂.

      刪除
  9. 今年是妳最後一年「三字頭」,那麼妳應跟我同年了。

    回覆刪除
    回覆
    1. 就嚟四張,其實我都未有好大震撼感,反而我老公前兩年四張生日前夕就牙痛咁聲 :P

      刪除
  10. 想請教一吓,今日陶傑在蘋果寫瑞士那篇文,妳覺得如何?接近現實嗎?

    回覆刪除
    回覆
    1. 瑞士d人真係細細個就滑雪, 年年二月都有sport holiday俾佢哋去玩Winter Sports, 不過係咪人人都係高手就唔敢講喇.

      瑞士人係咪排外要分兩個層面講; 先唔講對外國人, 呢度d人對自己canton既dialect係好自豪, 基本上個個canton都有自己既dialect, 有d中部地區d德文連我老公都要好留心至聽得明. 而大部份人都對自己長大既地方好有歸屬感, 唔想轉變, 前幾年要公投, 要將我住果個城市同隔離市合拼(其實兩個市一向關係密切, 基本上已經二合為一, 合拼只係手續而已), 但我住果個市d人好多極力反對, 重搞咗個campaign添, 不過最後公投結果都係合拼咗. 再擴大d講, 同一個國家, 德語區, 法語區已經係兩大陣營, 又甚至係同屬德語區, Basel 同Zurich都係唔太啱嘴型, 我老公就話瑞士人善長'how to dislike each other without killing each other off'. :P

      至於對外國人, 因為越嚟越多德國人過嚟工作, 大家文化有差異, 亦有人覺得佢哋來搶飯碗, 所以社會都有dd排外情緒(淨係睇瑞士人死都唔肯入歐盟就知, 總之佢哋唔會去搞人, 但亦唔想人嚟搞自己).

      刪除
    2. 現況是這樣的,明白了。

      試圖猜想一吓成因 (必然粗疏)。我想地理位置可能有影響;即如日本,因為是四面環海的島國,受火山地震海嘯威脅,兼以國土小,可遷徙之地不多,是以人民安全感極低,深感生命苦短,逼出追求極致的精神。瑞士則因位處歐洲中央,小國寡民,強敵環伺,危機意識強烈,唯有恪守中立以自保,人民亦滲著強烈自我保護意識 (妳所說的對長大地方有歸屬感,不想轉變),思想亦較為保守,甚至連國內區域也潛意識/有意識互相排外 (mr.b 說的dislike each other without killing each other off)。以上推論,唔知啱唔啱,無論如何瑞士給我的感覺就係悶就悶咗啲,但絕對係人間樂土。

      刪除
    3. 個人經驗係, 好傳統果d瑞士人通常都係血統純正果d, 即亞爸亞媽都係瑞士人, 呢d人一般都悶疍, 無咩國際視野; mix咗其他地方既瑞人多數open minded d, 又好玩d, 我d瑞士朋友同Mr.B都屬後者. 又通常越少接觸外國人既本地人就越排外, 好似早輪有關阻止大量移民既公投, 贊成既多數係無咩外國人既地方, Zurich, Geneva呢類大城市就反對.

      對鍾意戶外活動既人來講, 瑞士真係人間樂土呀, 淨係行山都行到你唔行啦. 我自問係一個城市人, 所以如果叫我住响d得一千幾百人既小鎮,我諗我一個星期都捱唔到, 好彩我屋企離Zurich都算近. 對我呢d自細娛樂口味好離地既人來講, 瑞士都叫滿足到我, 起碼我想睇既電影, 音樂表演都有機會睇到, 加上呢度去其他歐洲城市都近, 算係咁啦, 唔算最理想, 但都中上啦. 不過如果只聽容祖兒, 睇cctvb膠劇果d人, 嚟到瑞士一定悶到想死.

      刪除
    4. 講真要我呢種香港土生土長嘅城市人,去一個寧靜小鎮長住,真係唔容易sustain到。我自問都係一個唔怕悶,絕對可以遠離熱鬧嘅人,但如果叫我遷徙去譬如係"nebraska"裡面嗰個鳥不下蛋嘅小鎮hawthorne,我估最多三兩個月,就會乾死掉。

      刪除